Ibarwa Nandikiye Mushiki Wanjye Nkunda - Uko mbona Mkorogo

Kuri Mushiki wanjye nkunda

Nkwandikiye mfite impungenge,

N'agahinda kenshi shahu,   

Maze iminsi numva warakaniye,

Ngo nutabona Mkorogo,

Ngo ukunde ube inzobe 

Ushashagirane nka Beyonce 

Ngo isoko nirishaka ntirireme. 

Ese mama uzi ibibi byawo,

Ese uzi impamvu Imana yakuremye

Ufite uruhu rwiza rwirabura?

Ese uwo ugushutse ni nde?

Yo gacaracara, yo gacana inkindi, 

Akenyegeza ibisabo, nta bwoba agira.
Ngo ni uwo muhungu ugukunda? 

Ngo ubaye inzobe waba mwiza ?
Arakubshya sha. Wimwumva. 

Reka ngusangize uko nabibonye,

Nawe dore umaze gukura, uzifatire icyemezo.

Ese igiko, ubundi buriya ni iyihe mpamvu koko, ituma ubona isha itamba ugata urwo wambitswe na Rugira ngo aha witamure mo inzobe? Ese ubundi aba ari inzobe? 

Sinzi niba iyi nyandiko hari icyo iri bumare aliko n’iyo yakumira babiri njye naba nakoze icyo nshoboye. Ndareba ingingo nkeya zishobora gutuma ngira inama bashiki banjye, bamenye agaciro uruhu rwabo turuha, namwe wenda muri commentaires mwazashyiramo izindi nama. Ese biterwa n'iki? 

Kutanyurwa n’uko Imana yakuremye

Reka mbanze mvuge nk’uwemera Imana. Ikurema ikaguha uruhu rwirabura, yabonaga ko uri mu ishusho yayo gutyo pe kandi uri mwiza.  Gutangira gushakisha ukuntu wahindura uruhu, njye mbifata nko gupinga ibyo Imana yaguhaye. Njye nibaza uguriye umwana ishati, utarareba hirya ukabona afashe imakasi ayiciye amaboko n’ijosi, akayambara atyo. Hari igihe wakwicuza impamvu wayiguze. Ibi mbivuze nkanjye, aliko nshatse nanareba icyo Bibiliya ibivugaho.  

Ese abasore bakunda abakobwa gusa b’inzobe?

Reka da. N’ikimenyimenyi buri wa gatandatu ugiye ku nsengero uhasanga abana bafite uruhu rwirabura rwiza cyane kandi bakoze ubukwe bwiza cyane. Uwo muhungu ukubwira ko yumva ubaye inzobe waba mwiza, ntazi icyo ashaka. Numara kuba inzobe (bizaba se ahubwo?), azakubwira ko abona byaba salama ari uko ubaye mugufi cyangwa muremure. Uzongera amaguru se cyangwa uzayagabanya? IBAZE NAWE.

Ari abantu b’inzobe n’ab’uruhu rwirabura, abeza baba abahe?

Kugira ngo batajya babashuka, ndashaka kubereka abantu babiri batandukanye, bafite ibara ry'uruhu rutandukanye kandi batisize. Ndifashisha abari babaye Miss Rwanda, bivuze ko bombi bagaragayeho ubwiza ndetse n’ibindi basaba ngo umuntu abe Miss Rwanda. Aliko twemeranye ko ubwiza bwaje mbere.

Ngaho ibaze usa n'uyu mwana, warangiza ugashenga ngo haje Mkarago. MURASHOBORA 

Aurore Kayibanda afite uruhu rwirabura aliko ntibyamubujije kuba Miss Rwanda 2013. Bikaba Gihamya ko mu maso y’abatangaga amanota ndetse n’abatoraga kuri sms (sinibuka niba byarabaye), umukobwa udakorogeye ashobora kuba mwiza agahiga abandi bari kumwe mu marushanwa y’ubwiza. Ngaho nimwibaze iyo aba yarisize, akaba ari inzobe, aho ahinira intoki ari igikara. Mu maso ari inzobe, ku ijosi ari igikara. Ahaaa, byari kuba bisa nabi pe; nawe ntiyari kujyayo.

Reka turebe n'inzobe, nayo ni nziza pe kandi dufite Gihamya.

Izi ntoki ntushobora kuzibona kubera umukarago. BARABASHUKA

Turebe na Miss Kundwa Doriane. Afite inzobe nziza pe, uzarebe ku cyapa cya Airtel urebye nabi yatuma ugonga. Nawe akaba yarabaye Miss 2015. Urebye inzobe ye, ubona ko ari imwe kandi igiye umujyo umwe. Intoki zisa no mu ijosi, hagasa no munsi y’amatwi, naho hagasa no mu ruhanga. Iyi ni inzobe udashobora kugeraho ukoresheje umukorogo. Ureste ari Gitare Nyiringabo wayiguhaye. Mwikwifuza ibyo Imana yahaye abandi, ngo mwangize n’ibyo yabahaye kuko nta pièce de rechange uruhu rugira. 

Aliko se, ubundi iyo birangiye usa gute?

Nta muntu n’umwe ndabona witukuje (reka mbyite amazina yabyo) ngo bibe mahwi. Aba ari inzobe mu maso, aliko mu nsina z’amatwi hakaguma ari igikara. Akaba inzobe ku ntoki aliko ibikonjo n’aho intoki zihiniye hakaguma hirabura. Akagombambari niyo wagatwika, ntikajya gafata umukorogo. Mbese usanga ari uruvangavange rw’amabara hirya no hino ku mubiri. Kandi iyo wigumaniye umubiri wawe wirabura, uba usa neza bihebuje.

N'ibi mushaka koko? Ubu se ni nde wazakugirira impuhwe ari wowe wabyiteye?

Ese ayo mafaranga yo uzayabona mama?

Abagurisha Mkorogo bavuga ko iyo watangiye utajya uhagarara. Iyo uhagaze usubira inyuma y’uko wasaga. Ibi kubera ko bigenda bicikamo amabara atandukanye. Hamwe inzobe, ahandi igikara, ahandi imvange yabyo byombi. Ubwo se shahu, ko mbona n’ibihugu bijya bigira crise (reba Ubugereki ibiri kububaho), umunsi wagize crise ukabura uwo muhanya w’umukarago, uzasohoka mu nzu n’ayo mabara? Igumire uko usa sha. Kugeza ubu tugukunda usa gutyo, nunahinduka njye nzakuyoberwa.

 Ese nta ngaruka bigira?

Si ukugutera ubwoba aliko abaganga batandukanye cyane cyane ab’uruhu bemeza ko gutukuza uruhu bitera indwara nyinshi zinyuranye. Bitewe n’imiti iba ivangiye muri iyo Mkorogo ari yo za  hydroquinone, hydrocortisone (benzene-ibaze kwisiga na essence y'indege), quinacore,  clobétasol, ibi byose bikaba ari imiti yica uruhu buhoro buhoro.
Zimwe muri zo ni ibiheri, amaribori, diabète, hypertension. Bamwe bemeza batanashidikanya ko inshuro nyinshi birangira hajemo Kanseri y’uruhu. Ngira ngo muribuka uko wa muririmbyi w'igihangange byamugendekeye.

 

Ngaho ibaze wasaga n'uriya muntu wa mbere, ugashega ngo urashaka gusa n uwa kabiri, bikarangiza usa n'uyu wa kane n'intoki zisa no kuri iriya foto ya gatatu. IBAZE NAWE. 

Nanzura nivugisha rero Nshuti ya Data, dore uri igitego uko umeze, wishukwa n'abashungerezi ba Kigali, ngo baguteze ubwo burozi, ejo nuba wabuze uko usa baguhe urw' amenyo. 

Yari Musaza wawe ugukunda, wemeye gufata risque yo kukubwira ibyo benshi bakuvugira mu matamatama. 

Post Scriptum: Ndisegura kuri ba Miss bacu, nifashishije amafoto yabo ntababajije, ni uko numvaga mutampakanira kwigisha bagenzi nifashishije amafoto yanyu. Erega muri n'abacu maye. Merci. 

Dore hamwe na hamwe wabona amakuru

Kanda imwe muri izi link zikurikira urebe icyo bagiye babivugaho. 

Video kuri France 24 

Inyandiko iri ku Inyarwanda 

Inyandiko iri ku Igihe 

Inyandiko iri ku Umuseke

Inyandiko iri kuri Bon Coin Santé 

Inyandiko iri kuri La Santé POur Tous